21 October, 2008

No.44: Chindia Digest No.14

Tunlai khawvel hi a chhe tawh mang e tirawh u. Chanchin han chhiar ila, ram leh ram, hnam leh hnam indo/inthah, lirnghing, tuilian etc leh khawvel economy tlachhe mekte han thlirin, keini ringtute tan chuan thilmak vak ani lo. Baibul ah alo hrilhlawk dim diam tawh si a. Chutih laiin, Isua hnungzuitute kan nih angin, Isua la hre ve lote 'hrilh leh zirtir' hna kan kova innghat hi tihtakmeuh a tan lak a tul ani. Hun hi a hluin a hmanhmawh si a, a ram tihzau nana kan tihtheih ang theuh va hma la thar turin ka han chah veleh phawt che u. Engpawh mai hi ngaia neih hi a awl riau ania.....chuvangin in hriat tawh hnu pawh nimahse ka han tiri leh ani e. Mahni in/chhungte/khua/ram kalsana penchhuk ve thei lote pawh, kan awmna zawn theuhah tihtheih kan neih kha inhre thar leh ila, tawngtaipuina a tan minlo lakpui bang lo turin ka han chah leh mawlh mawlh phawt mai ang che u.

Ringtute nunah din changte, kal chak chang te, tlan chang te a awm thin. Kan kal beuh beuh chauh emaw intih laiin Pathian hnathawh a thleng tup tup a, chutih rualin hmelmapa lahin tan alo khawh ve nasa bawk. Rin phak bakin Pathian an chet meuh chuan, rawngbawlna ah a um a um dawr dawr ngaih changte pawh a awm ve ta. Pathian thu hreduh leh a chanchin hrechiang duha min kawm duh hi an pung nasa hle. Helaia kan rawngbawl dan erawh chu in hriat tawh kha. Mi chuti zat ringtu ah an inpe/ bap-tis-ma an chang tih lam nilovin, a chanchin hriatir turin remchanna tinreng kan lei a, mi engemaw zah Isua chanchin hre duh rinloh lam atangin an rawn awm nawlh nawlh te hian, heng huna lo puih hi kan tihtheih tawk ani miau mai a. A chi tetakte kha kanlo tuh ve a, a tuipek leh thanlen lam erawh chu kan tih phak bak niin Thlarau Thianghlim kuta hlan ani leh mai.

Ka zirtir leh thian hluite, heta an zirna an zawh tak avanga hmun danga hnathawk leh zir zawm ta te, khawnge an awm tak tih pawh hriat loh te hnen atanga, an hnena a 'chi' kanlo tuh ve teng teng thi mai lova, Pathianin tui alo pek zawm zel chanchin han hriat te hi a nuam a. Tun hnua an thinlunga hai rual lohva lo thang zel ta chanchin han hriat hian, a ropui tih mai bak chu sawi ngaihna pawh ka hre lo. Ka zirtir lai mekte ah pawh Pathianin nasa takin hna a thawk mek zel ani.

"Ringtu ka ni thuai dawn":
Kum 3 kalta khan Dandy a ka zirlai niin ka kawmngeih hman hle a. Sorkar hriatpui kohhran a ka naute 8 ho ka inkhawmpui tuma tel ve kha ani nghe nghe. Ka thawhna University atanga graduate chhuak tawhin mahni 'business' a tan a. Shanghai a khawsa thei tak anni bawk a, a hna lamah pawh a hlawhtling angreng fu a. Phone hi chuan a khat tawkin kanin biak zawm zauh zauh thin a. Tunhnai mai khan Xi'an alo tlawh dawn leh min hmuh a duh thu min hrilh a. Xi'an alo thlen chuan minlo phone in chaw ei chhuahpui ah min sawm a, a zirpui thin leh a kawmngeih em em Rocky leh ka thian dang ka sawmte nen kan chhuakho ta a. Kan chhuah hma atang tawhin ka thinlungah hian Baibul ka pek tak te kha ala chhiar zawm ta em tih leh engang chiahin nge rinna lamah a dinhmun tih hriat ka chak hle a. Mahse midang ho nen kan nih nuaih avangin a hrana han zawhna hun a awm bawk silo.

Kan chhuak ta a, bus dinna atanga chaweina tur pana kan kalphei tham tham chu amah zawk chuan ti hian a rawn sawi phawng mai a. J, "Ringtu ka ni thuai dawn" a rawn ti phut mai a. Ka hriat chak tak leh ka titipui duh tak sawina hun a inhawng chu ani ta reng mai! A sawi zel naah chuan, khawvel hausakna/sumdawnna hlawhtling ve tak kar pawha a rilru a hahchawlh loh thu leh, Pathian thu a thinlung a a cham reng thu min hrilh a. Chu chuan Isua hnung zui duhna thinlung a neih phah ani. A classmate thin Rocky a, ka kawm ve hman nual tawh, pawh chuan rawn chhunzawm vatin duhtawkin Xiaozhai, Bazar na hmunpui, mipui kal nuaih nuaih karah chuan tui takin kan sawi phei ta bawrh bawrh a.

Kawm chhunzawm pawh ka chak hle. Mahse, a tuka haw leh nghal mai tur ani a, Pathian kuta nghah mai kha a him ber mai. Shanghai a ringtu dang awmte hmang pawhin aniang, engtik emaw niah chuan Pathian angchhung a thlen ve ngei hi ka ring tlat ani. Kan Pathian hian mite a ngah a, hna a thawh chuan engmahin a dalzo lo. Dandy leh Rocky te pawh hi inlo tawngtaipui thin kha anni a, Isua ke bul thleng rak an thlen theihna turin inlo tawngtaipui zawm zel dawn nia.

"Sakhaw zawm tur ka zirkual mek"
Ka thawhna University a Foreign Affairs Director (Waiban) hmasa ber Freeman, Chaina ka thlen hmasak bera ramdangmi zirtirtu te min enkawl tu hmasa ber kha ani a. Kan in kawmngeih hle a, duhsak pawh min duhsak thei viau a. Thlaruk ka awm hnu lekah lekha zirzawmin University hranah a insawn a, tichuan nikum lam atang khan Zhejiang Province (Shanghai bul lawk) ah hna a thawk tawh a. Ani nen pawh kanla in contact chhunzawm zeuh zeuh reng a. Amaherawhchu, ka u mipa a accident tawh avangin Zoram a kalo haw zawk leh, lirnghing leh olympic vuatvelah tunkum chu kanin contact mumal vak lova.

Nikhat chu a sms ka dawng nawlh pek a. A subject zirtir lai lekhabu a awm Buddhist sakhua thumal pahnih (ka hre ta mai lo tlat) lam dan leh a awmzia min rawn zawt a. Kristian kani tih a hria a, a hnenah pawh titipui na ka nei nual tawh thin a. Mahse India mi ka nih vangin Buddhist sakhua lam hre tak turah min ruat ni ngei tur ani. Tichuan, kalo en anga, minlo phone chhunzawm turin kanin remsiam a. Min rawn phone ta reng a. Min zawh bak, ama rinna lam te kan sawikai chhoh zelah chuan, tunlaiin sakhaw dang dang bu a chhiar kual thu leh, sakhaw engemaw ber zawm a tum thu min hrilh a. Kristianna pawh a zir mek bawk tiin, darkar khat chuang kanin bia ani.

Tunhma chuan a buai a intih avangin a ngaihtuah ngai lem lova, mahse tunhnu a sakhaw vawn neih a thatzia a hriatchhuah thu leh a duh thu min hrilh a. Kalo tawngtaipui tur thu in kanin thlah ta ani. Hei vang hian alawm, rawngbawla pen chhuak ve theilo te pawhin, mahni awmna apiang a rawngbawltu kan nih theih na chu. Amah hmangaih em emtu leh a nun pawh ui lova petu, Isua alo zawn hmuh ngei theih nan tawngtaipuina a mamawh takzet ani.

SMS hmangin:
SMS hrelo kan awm tawh lo ang. Ka nu takngial pawhin message thawn alo thiam ve tawh nge chu ka hrelova, thawnsa ho hmetchhuak kha chu a thiam tawh chiang mai a. Tunlai thil, thalai te kutzungtang exercise nan a hman tamna ber, rawngbawlnan pawh alo tangkai veleh zel mai.

Semester tin zirlai 280-320 bawr vel hi ka nei thin a. Ka zirlai te ho hian ka mobile number min dil ve ziah thin a. A hma chuan privacy awmlo khawpin minlo call/sms hlawm ang tih ka hlau thin a. Mahse ka pek tak hnuah sap tawng rawn hman a ngaih thin avangin minlo call/sms erawh chu an tam vak thin lo bawka, min dil chuan ka pe ta zel a. Tumkhat chu, tu ber tih hriatloh ka zirlai pakhat atangin sms ka dawng nawlh mai a. A thu rawn ziah chu "Khawnge Pathian hi a awm a, tuin nge Pathian hi siam tih ka hre duh ani?" tih ani bauh mai! Ka call duh lem lova. A chhan chu, sap tawng hmang hreh tak leh thiam vaklo alo nih palh hlauh chuan, kan topic sawi a tuilo zo vek ang tih ka hlau a. Tichuan, sms vek chuan kanin chhang ta char char a. Chuta tanga ka hriat thiam dan chuan, an dormitory/hostel ah Pathian thu anlo sawi hova, he zawhna chhanna hi anlo hre duh hlawm chu niin! Kan in contact zui ta lem lova, tunge anih pawh ka hre zui ta lemlo. Thlarau tuihalna an neih a, zawhna tamtak an neih theih nan kan tawngtaina ani fo bawk a, a bak chu Pathian kuta nghah leh tawp ani mai. Mahse, rilru a tihlim thove.

Vawikhat dang leh pawh, Kor 13:4-8 thu hi sap tawnga ziakin ka zirlai pakhat hian minlo thawn leh nawlh bawk a. Tunge anih leh ringtu anih leh nihloh ka hre lova. Sawi zawm pui ka duh avangin zawhna tihian ka thawn let a, "Khawi atanga lak chhawn nge i hria em? He thu hi i hre tawh ngai em?Engnge i ngaihdan?" tiin ka thawn let a. Minlo chhanna chu a nuihzatthlak zawk, "Baibul ami ani a, Kristian i ni sia i hrelo ami?" mi rawn tilet zek mai a. Ringtu kanih hriain minlo thawn ve chu lo niin. Khawi atangin nge lakchhuah na chang a hriat pawh ka hre lo. Mahse, hetiang han tawn te hian nun hi a tihlim em em ani.

"Pathian thu min zirpui thei em?"
Pathian hmanraw ngah zia hi chu aw, mihringte ngaihtuahna hian ava han hrephak lo tak em!
Tunah ka thawhna ah hian ramdangmi zirtirtu pahnih chiah kan awm tawh a. Kei leh James a, ani hi American ani. Kan sakhua a inan loh mai bakah, kan tum a inang baulo bawk a, kanin hnim hnai vak lemlo. Ani Baha-i sakhaw vuantu nghet tak anih mai bakah, he sakhaw rawngbawltu (M) ani a, nasa takin zirlaite zingah hma lak a chak em em a. Kartin vawi 2 tal, an baibul ani mai ang chu, zirpui na a nei thin. American ani bawk a, naupangte tan lah tawng zir nana remchang tak ani ve bawk nen.

A pathian lehkhabu zirpui naute zinga pathum hi zankhat chu dar 8:30 vel ah anlo leng ve mial a. Sakhaw lam te pawh sawi kaiin kan titi hluah nghe nghe a. Tuna ka zirtir lai te vek anni. Tichuan, hun a rial deuh a, an zinga pakhat Sandy-i chuan nikhat an class ka lak zawh hian min rawn panin, tihian mi rawn zawt a. "J, Baibul thu min zirtir thei ang em? Hei tunlai chu Baibul chhiar ka thinlungah a lang tlat mai a, James a Baibul ka dil a. Pakhat a thian ten an pek veleh chhawn alo nei hlauhva, chu chu min pe a ka chhiar mek. Genesis atangin ka chhiar rawih a, mahse hriatthiamloh ka ngah lutuk a, min zirpui theih chuan ka lawm ngawt ang", a rawn ti a. Hei tak hi ani Pathian hmanraw ngahzia ka tihna chhan chu. James a hnuaiah Bahai a zir thin a, James a bawk chuan Baibul a pek a ngai ta bawk si a. Mak thei ve tak chu ani.

A duh phawt chuan a tuka lo kala ka zirpui theih tur thu ka hrilh a. Tichuan hlim deuhin ka hawng a. Mahse, chumi ni vek chuan, e-mail hlimawmloh zet mai ka dawng ta tlat mai! Ka rilru an hnual rawih phawt a, mahse tunhma pawha kalo tawn thin thlarau indona nasa takah ka lut mek ani tih ka hre thuai a. Pathian in kawng a hawn apiangin, a inzawmzat deuhthaw hian India lam (chhungte/thiante/thenrual etc) atangin chanchin thalo, minti hnual tur hi ka tawng deuh ziah thin. Chu chu hria in, ekhai! hmelmapa min beihna anih hi. Intihhnual nan ka hmang dawn awkawnglo...ka rinah ka chiang a, Pathianin min awmpuiin he harsatna hi min kaltlangpui dawn ani tiin ka rilru tawngtai chungin ka insawhnghet ta a.

A tukah chuan (10th October) Sandy leh a hma a min tlawh duhtute sawmin Marian, Sunny leh Miya te nen kan panga chuan hun kan hmang ho ta a. Kan Australian thawhpui, an ram lam atanga DVD "Indescribable" tih an rawn thawn ka hawh, minute 45 awh kan enho phawt a. Khawvel pawn ropuizia, planet hrang hrang leh mawi tak tak te, leh vansangah kan hmuhloh leh hriatloh thil ala tamzia, siamtu awm lova a awm mai theih rinawmloh na te Pathian thu leh astronaut ten a an thlalak hmanga buatsaih ani a. Kan han enzo chu sawitur an ngah nasa mai!

In hriat theuh angin, Chainese ho chu 'athiest' an ni a, science hian an nunah hmun a awh zau hle a. Hetianga mithiam leh astronaut te ngei thlalak hmanga Pathian thu a sawi chuan a hneh hle ani. Pathian awm an rin miau loh avangin, anni tan chuan zawng thlah kan ni tih kha an pawm mai a, scientist ho sawi chu an pawm mai zel bawk. Kan sawiho zelna lamah duhthlanna (choice) te kan sawi chho a. Chungte zinga min zawhna thenkhat chu:

1. Pathianin duhthlanna nge a siam hmasak mihring?
2. Pathianin engkim a hriat chuan, ngatinge thil diklo kan thlan dawnin min stop loh?
3. Thil diklo kan thlan tur pawh a hrelawk vek awm sia, duhthlanna min pek engnge a sawtna?
4. Eng Pathian ber hi nge dik? Engtinnge ringtu ka nih theih ang?
Tihte a ni nuaih mai a. Tunhma chuan, theo.deuh kaihhnawih zawhna chhang turin ka insit thei em em a, chuvanga Pathian thu zir leh duhna pawh nei lian thin tak kha ka ni a. Mahse, mak deuh chu, hemi zan hian Pathian thlarau thianghlim kaihhruaina a takin ka chan ka hre thei. Pathianin ka aw leh ka min hman sak a, finna min pe ani tih ka hre thei ani. Keima irawm atanga chhuak atan chuan ka chhanna te kha ka thiamna leh hriatna in a tlin hlawl lo. Ropui tak ani, a huna Pathian rawn intumchawp dan hi.

Tichuan, an pali chuan engtinnge Pathian diktak an zawm/hriat theih ang, sakhua lah a tam si a an ti a. "Pathian hian thil chi hrang hrang hmangin amah zawngtute hnenah a inhriattir thei a. In thiante, chhungte, midang in la hriat ngai miahloh leh thilsiam atangte pawhin a inhrattir thei ani. Pathian diktak in hnena inlar/inhriattir turin tawngtai tawp phawt mai rawh u", tiin kanin thlah a. Inhmuhkhawm leh pawh an rawt nghal a, harsatna dang te a awmlo anih chuan kanin hmu khawm leh dawn ani. Pathian hnena minlo thlenpui dan tur chu a chiang thawkhat in ka hria. Mumang lam hial te pawh Pathianin a hman tangkai theih kha maw.

Baibulah : "Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a,thinlunga ngaihtuah leh tumte hi a hre nghal thei a ni".(Heb 4:12) tih kan hmu a, ka naute leh ka contact ho zawng zawngte hi Pathian thu nungin an thinlung chhun tlang se tih hi kan tawngtaina ni se.

Ka mimal harsatna tawh pawh chu mak tak maiin chawlhni zan a thlen meuh chuan tihkianin a awm leh ta vek mai a. Fiahna ka tawk ni ah ka ngai. Mahse Pathian thutiam ah ka ding nghet a, ka harsatna ah focus lovin Pathian kutah zawk ka nghat diam a, anin a thutiam ah dingnghetin ka harsatna tawh pawh min kaltlangpuiin min sutkian pui ani tih ka chiang. A hming fakin awm rawh se!

(Hei hi ka newsletter ami ani a, fimkhur thu hlaah tlem azawng thlak danglam/siamrem ani. Tawngtaipuina tam zawk an dawn theihna tura ka blog a rawn post ka ni e.- J).

4 comments:

  1. In sawi takah chuan ka tawngtai kalphung thlak angai tih min hriattir a,lawm awm hle mai.Tawngtai tam hle e tilo chuan ram pawna thawk chhuakte tan hian ka tawngtai khat khawp mai a,ka lo tawngtai pui thin dawn che u nia.

    ReplyDelete
  2. Hi dear,Please wrote in English otherwise i can't share with it. P:)

    ReplyDelete
  3. @Thinchhia,ti lawmom khop mai. Nie,pawngpaw tawngtai tawp ai chuan, a bika tawngtai pui dan hriat nan a tha ve khawp mai.

    @Rachel, nice to see you here :) ummm...please bear with me.Sometimes I'll be writing in Mizo, but most of the time in English.I have a solution for you though; how about learning Mizo lolz!

    ReplyDelete
  4. This solution sounds good,You should teach me from ABC of Mizo, ok?

    ReplyDelete