23 May, 2008

No.33: Tunkum

Kumin chu thil chi hrang hrang ka tawng nasa hman hle mai. A tha lam aiin a chhe lam a tam zawk lehnghal a. Amaherawhchu Pathian hnathawh leh a thutiam a a rinawmzia min hmuh chiantir tu anni tih ka hmu chho zel. Tunkum Zoram ka hawn hmasak (Jan/Feb) in kum 6/7 dawn kalo hman tawhloh Mizo inneih leh thihna ka rawn tawng phawt a, China ka let leh hnuin sorkar in visa apply chungchangah rules anlo ti danglam a, harsatna liantham em2 chu nilo mahse rilru kap tunin ka han awm leh phawt a. (Min enkawltuten passport an thehluh tlai avangin 'working visa' ka hmuh hmain ni hnih ka overstay hman ani. Mahse overstay man approx.Rs 6000 vel pek ngai miah lova, ka thawhna Uni.ten min tihfel sak diam dan te kha thil mak tak ani.) Chutah ka u accident tawh avangin thlakhat chawlh lain Aizawl pan ahan ngai leh rum rum te. China ah kalo let leh hnu ni 5 lekah nasa tak lir ahan nghing lehnghal. Sawi tur a tam hle mai.
Ka thil tawn zawng zawng chu sawi ka tumlo.Ka u damlohna chungchanga Pathian kaihhruaina leh a thiltih mak takte hi upbo pui atan chuan ka phal hlawl lo ani ber e.

India lamah thlasik chawlh (Jan/Feb) ka hmang zo chauhva, thla 1 leh a chanve awrh hna ka thawk leh hman chauh tihin, Aizawlah ka u (unau neichhun) feet 10 vel ko atanga tlain a nunna hial hlauh mai thei dinhmuna a din thu 11th April khan minlo hrilh thut mai a. Tichuan (13th April-12th May) khan Aizawl lam ka pan leh ta rum rum a. He chhiat thila Pathian hnathawh ropui takte (kan chhungkaw tan chuan miracles) avangin lawmthu minlo sawipui mawlh mawlh nan ka han tarlang ange:

1. Ka u tlakna hi , Saron vengah ani a, Civil hospitalah dah ani. Ko chung atanga motor siamna hmun, thir chhia leh thil hriam takte awmna hmuna tla ani a, a sahuat (vital organs) pakhatmah a khawihlo hi thilmak a tling ani. A mitmu tak khawih chhe silovin, a dinglam mit ko chung atanga a khabe thleng thuk takin a thler thla hawk a. A taksa dang engmah a tina tello bawk. (Kan hriat danin, a tlakna ngaihah chiah hian midang lo tla ve tawhin, a nunna a chan ani.) A tlakna enin, a nunna chhanhima a awm hi a makin a ropui kan ti thlawt ani.

2. Khualkhua a na kan nih avangin, eng angin nge an kalpui thin tihkan hre chiah lova.Thisen a hlauh nasat em avang khan a nunna hial derthawng kha ani a. Mahse thisen unit 10 lai an pek kha, a sumin emaw, thisen veka chhungte atanga donate/replace leh tura min tilo kha kan tan chuan thil mak a tling.

3. Ka u accident zan in, zai ngai dang/accident tawk damlo dang awm miah lovin, (vun,ha,ruh) specialist thah doctor pathum rualin duhthusamin an khawih rawn thei kha ava lawmawm lehzel em!

4. Doctor ten an zai laiin a lungphu leh mar an hlauh hman a. Doctor te hial beisei bo hnuah Pathianin a chhanchhuak leh ani.

5. A accident zan hian, hmelhriat miahloh leh la hmuh ngai miahloh Pi Tluangi (Rev.Rualkhuma nupui - Pathian hla sa thin Isak Malsawmtluanga nu ani awm e) leh a thian thenkhatte tawngtai tura hmun dang pana kal, Aizawl civil hospital bul anlo thlenin a 'tul' ta tlat mai a. A chhan pawh hriat silohvin hospitalah kal ngai tlatin thlarauvin a hriattir a. Hreh chung chungin, hospital gate panin a 'tul' chhova. A chhan a hre bik silo. Hmun danga kal a tum pawhin a kal thei hlawl bawk silo. Chuta kan chhungte lo ding pakhat hnenah chuan,"Engnge min hrilh duh i neih?" a ti tawl mai a. Tichuan kan chhung chuan ka u accident chanchin alo hrilh a. Chutah, blood bank a a dawn tur thisen chunga tawngtai turin Pathianin a hriattir leh ta a. Ka u thisen dawn tur te, amah zai mektu Doctor te leh an hmanrua hman tur te chenin Pathian hnena hlanin tawngtaina an hmang ta ani. He thil mak tak hi chiang vak lovin kan hre thuak a, mahse kar hnih hnu velah amah Pi Tluangi ngei ka u tlawh tura lo kalin min rawn hrilh a, chiang zawkin kan hre ve chauh ani. Khualkhuaah hmelhriat ngai miahloh hmanga Pathian hnathawh mak tak zawng ani!

6. Ropui leh em em dang chu, tawngtaina khati zozai a dawng kha. Aizawl, Lunglei, Shillong, China leh Australia a kohhran tamtak ten an tawngtaipui kha chhanin a awm tih hi. Kohhran bik pawh awm lovin, kohhran hrang hrang (Bap, Presby, UPC, Salva-tion, etc) thahnem takten an tawngtaipui ani tih kan han hre lehzel kha a ropui thlawt ani. Aizawl veng hrang hrang ami, a hmaa min hre ngailo tute pawh anlo lenluh changa kan chanchin min zawh atangin, 'eeee...nangni inni maw? kan kohhranah kanlo tawngtaipui asin', anti thei deuh zel khan mizo leh ringtu nih a tinuamin, rilru hi a tihlim takzet. "Lalpa, keini chhung hi engnge maw kan nih a heti ema min hmangaih ni?" ka ti vawng vawng.

7. Khati khawpa nunna hial hlauhthawn awm khawpa na khan, kar hnih leh a chanve lek hnuah mahni insaseng thei vek khawpin a tha chhuak leh a, doctor te hial mak tih khawpin a tha chak kha a ropui tawp!

8. Khualkhua a harsatna tawk kan ni a, min lainattu chhungte leh thiantha rinphak baka thahnem nitin min tlawhtu kan hmu khan rilru a khawih hle mai. ICU ward a awm lai atang tawhin, pawnah hian hmun awhtu tamber ni khawpin min thutpui hmur zel mai a. ENT ward a a insawn hnuah lah, nitin inkan hun a thlen hi chuan damlo dang thutthleng hawh ngai khawp leh nurse te hialin, "chhuak then mai teh u" tih ngai khawp a min lainattu leh min tawiawmtu zawng zawng te Pathian malsawmna rah liau2 ani tih hriain, a let tamtakin malsawm mawlh rawh se tih hi ka tawngtaina ani.

Tunah chuan ka u pawh tawngtaina avang chauhin rin phak bakin dam lam a pan chho mek a. Operation tenau leh khawih ngai neuh neuh chu la awm mahse, a pawimawh ber, a nunna a him a kan lawm hle tawh ani. Mangang, bangbo, taksa leh thlarau nun chau taka kan awmlai te chenin kan Pathian hi a thutiamah a rinawmin a dingnghet ani tih hi a chiang em em a. Mi tam thei ang berin kan chunga a rinawmzia hi hre ve se tih hi ka duhthusam ani.