19 December, 2008

No.47: Hawn min ti hreh thintu te

Christmas leh hawn chak tuipui hunlai ani leh ta. Keipawh hawn tumin ka inpuahchah ve mek a, amaherawhchu keini ang tan chuan hawn a chakawm rual rualin, a chakawm loh ve thei tlat. A chhan tlemte ka han sawi ve teh ang.

Ram danga awm lai hi chuan lungkham tur hi a tlem zawk amoni chu aw ka ti. Mahni rama han haw dawn meuh chuan, helama kan mamawh miahloh thil tamtak lei/hawn leh ngaihtuah a ngai leh dawn anih hi.

1. Thawmhnaw lam hi rilrua lang hmasa pawl chu ani thin. He lamah formal taka inchei a ngaihna a awm miau loh avangin, haw dawn hi chuan biakin leh thil tihkhawmna mitthlaah a han lang nghal a, thawmhnaw formal deuh ngaihven nghal ruai hi a tul tlat thin. Chutah, mahni chenna lamah eng ang 'ishtyle' nge tunlai an uar tih kanlo hre em em tawh si lova. Thing bik emaw over emaw nih kanlo hlau ve roh bok si, lu a hai duh deuh chu ani!

Ka hawn hnuhnun berin thawmhnaw ka lei haw lova, Aizawlah ka lei chawp mai ang ka ti a. Millenium ah ka han bazaar chu, China lam siam thawmhnaw hlir anlo zuar chu niin. A man lah chu an han chhiar to hlawm khawp mai a. China a a man hre kur si, lei tho ngai bawk siin, ip chawih chawih in ka lei ta anih kha. Kalo hawn talo chu a inchhirawm duh khawp mai. Tun tum chu mahniin hawn lel tawh teh ang.

Tunkar ka bazaar naah helama pheikhawk brand tha ve pawl (Daphne) an sale ka hmufuh hlauh maia. Sale loh lai chuan lei tinah pawh kan tin ngamloh kha ani a. Tichuan, vannei inti takin, chatuan daih turin pathum kan lei pawp mai. Bun ngai silovah chuan duhthawh ve tak chu ka ni :) Pakhat dang hi chu sale ka hmuhfuh hmain a to a to mangkheng in kalo lei hman pek a. Pawilo ti tawh mai ang. Hawn leh hun atan inhmakhua sa ni mai. 2006 kumtir pawh khan Shanghai ah pheikhawk rawngsang ka leia, inah ka hnutchhiah nghal daih a, hawn apiangin bun chhuak veleh mai :P
Pheikhawk sang sawi takah chuan, helamah chuan bun chu sawiloh, a neih pawh ka nei lo. Tunkum kumtir kalo haw pawh, in lam (Shillong) a haw hmasa lovin Aizawlah ka tlang diah si a, ka cousin pheikhawk ka bun hawh tehreng anih kha! A sang a sang mangkheng hi min hawhtir lehnghal a. Saron vengah ka inkhawm a. Inkhawm kal lam kha chu kala bun tluan thei hram a, haw lamah chuan ka ti thei ngang tawhlo. Thlenna in hnaih deuh hnuah ka phelh te te a, ka khai nawlh a, kelawngin ka haw ringawt tawh bawk. Tuntum kalo haw leh tur pawh eng tak ang leh ang imaw!!

Helama hak ngai reng reng loh, coat te pawh ka han lei ve a hei. Alo out-dated hman tawh leh China 'ishtyle' alom kan ti zeih ve tawh mai ang chu.


2. Mahni in/khaw lama haw ni thin mah ila a khawharthlak. Thian hluite hmun dang dangah anlo khawsa/hna thawkin anlo awm darh dial tawh a, a awm chhun te lah mahni buai buaiin anlo buai em em tawh mai si a, kawm tur nei lova hawi hil lawl a awl duh khawp mai.

3. Phur leh chak takin mahni inchhung ngeiah kan han thleng a. Mahse, mikhual ang mai a chet alo ngai tawh a. 'Mikhual ang' ka tih hian eng dang nilovin, ka thawmhnaw ho pawh ka zin bag ah ka vawm lut leh zel. Avang chu in dah darh deuh chuan, in chhuahsan leh dawnah zawn buai leh chiam a ngaih bakah theihnghilh a awl si a, chuvangin mahni inah pawh kil khatah ka inkhuar thin ani deuh ber mai. "He khawvel hi kan khualzinna ram ani", tih hi ka tan chuan a dik lehzualin ka hre thin.

4. Mahni vengah kan lang duh. Kum tela hmun danga awm daih hi chuan chanchin inhriat pawh alo har a, thenrual leh thiante nen ngei ngei pawh titi a rual tawhlo. Thil tawn, hmuh leh hriatte alo inang tawh lova, duhzawng te pawh alo inthlak vei nen, titi a rualrem tawh thinlo. Khawr tut a inhriatna a lian duh.

5. Han inkhawm ila, tunhma a kanlo hmuh than em em leh kohhran puipa te leh inti neitu kanlo tih ve em em thin te hmel hmuh tur awm talo thin hi chuan lung a tichhe thin. Vanramah kanla inhmu dawn ani tih chu hre mah ila, han haw ve changa hlim tak leh nel taka han biak bawrh bawrh tur an han awm takloh hi chuan rilru ah an cham veng veng thin.