06 May, 2009

No.50: Ka Nu, ka lawm e

Tun chawlhni lo awm tur 10th May 2009 a 'Mother's day' (Nu ni) denchhen pahin ka post 50 na hi, ka nu min hmangaihna leh ka tan a hlutna te ziahchhuah nan ka dedicate ani.

Nikhua ka hriat theih tirh te atangin sikul kal tura kan unau a kan chhuah dawn tep a , ka nu in nitin kan lu chunga kut nghata min tawngtai ziah thin kha ka hrereng thin. Zingah kan unauvin kan han thova, hmai kan inphihfai a, thingpui in zawh a zirlai kan bih lailawk laiin ka nu'n zing chaw kan eitur leh 'tiffin' kan paitur buatsaihin rawng alo bawl thin a. Chutah, chumi ni a kan zir tur lekhabu kan ipeah kan han thlak kual a, uniform kan han ha leh te te a, tichuan chaw kan ei thin.

Sikul kal tura kan inpeih fel vek hnuah, room a khumah min thut dun tir ren rawn a, kan lu chunga kut nghatin Pathian hnenah min hlan ta thin ani. Kan tet te atanga hetianga min tawngtai ziah thin anih avangin kan len deuh hnu chuan ngaiah kan neih mai a. Khua reiah chuan kan insiam zawh a kan inpeihfel vek hnu ah, kan unau chuan khumah kan thu awt a, ka nu chu tawngtai tur in kan ko mai thin. Ka nu a damsam lohva, a hmanloh chang erawh chuan ka pa in tawngtaina a hmang thin thung.

Ka u thiante leh ka thiante hian min lo sawm ve ve thin a. Chhuah hmain kan tawngtai ziah thin ani tih hriain anni pawh chuan kan sitting room ah minlo nghak ve mai thin a, a chang chuan anlo tel ve lawp lawp thin bawk a. Tlai deuh chang khan a hrehawm thin, rilru kha a hmanhmawh zek zek duh khawp mai. Mahse, ka nu min kaihhruai danah tlai leh hma khan awmzia a awm vaklova, tawngtaina chu kan thulh phah ngai meuh lo. High School ka rah ve tak kum atang chiahin min chhunzawm pui talo chauh ani.

Tun hnuah hian, a inpekna leh taima taka kha leh chen tawngtaia min hlan leh min kaihhruai thin avang chiah khan tun dinhmun hi thleng chho thei niin ka inhria. Fa han neiin han ti ve tur ni ila, ka tlin ka ringlo takzet.
Ka nu mah nise, a tih tang tangna nun kha ka ngaisangin, entawn tlak tak nu kalo nei hi vannei ka inti hle.

Ka theihnghilh tawh loh tur dang leh pakhat chu, inkhawm a ngaih pawimawhzia kha a hmutu mai nilovin, a taka min zawm pui tu ani bawk. Naupang te kan nih atangin, kan unauvin zanah leh ruah sur hnuaiah pawh inkhawm turin biakinah kohhran inkhawm awm apiang deuhthawah min hruai ziah thin kha ani. Rinna lam a min kaihhruai alo tum ruh zia mawlh kha a hlu ka ti. Naupan lai chuan a hlutna hrethiam lovin ning thin hle mah ila, tun hnuah hian kawng dik min kawhhmuhtu anih zia hrechhuakin, ka nu min hmangaih zual tirtu alo ni ta. Ka nunkawng min kaihruaitu ani a, ka damchhungin ka theihngilh ngai tawh dawnlo ani.

Ka nu, entawn tur min hnutchhiah avang leh nun kawng dik mi kawhhmuh avangin ka lawm e!

10 comments:

  1. A the hle mai. Nute pawimawhna te, zah an phuna te hi inzirtir tam luat a awm thei lovang. Mi tam tak chuan kan nute ropuizia hi an thih hnuah te kan hrechhuak a, amahni'n an hriat phak tawh loh hnuah kan fak chauh thin.

    Ninawm ni lo se, i thuziak a tha tan khawp mai. Amaherawhchu, 'ani' tih hi i hmang dik lo deuh vek. 'Ani' tih chuan, mihring sawina (eg. ani chuan kan natnate a phur ngei a...) a ni a, mahse, thu tawpa kan dah chuan inzawm lovin, 'a ni' tih a dik niin an sawi thin. Tin, 'lo' hi a thu hma lama mi nen i zawm tlangpui a, a zavai hian zawm loh vek zawk tur niin a lang - eg. Kanlo, anlo, dawnlo, alo aiah - kan lo, an lo, dawn lo, a lo, tih zawk tur ni awm tak a ni.

    Tin, mi tam takin kan tihsual fo chu, 'lo' leh 'rawn' hi a ni. Kan awmna hmun atanga kan sawi a nih chuan 'rawn' hi hman tur a ni a, mi awmna hmun atanga kan sawi chuan 'lo' hman tur a ni ang. eg. 'Kan inah min rawn (lo ni lovin) sawm..'. Kalkawnga i kal lai a sawm che a nih chuan, 'Min lo sawm a..' tih pawh a dik tihna a nih chu!

    Intithiam leh intithei lamah min ngaih loh hram ka beisei. Hmasawn zel tum i ni a, ngaih loh lamah i ngaih loh ka beisei.

    ReplyDelete
  2. @Zaia: Ekhai, ka va lawm em. Thu ziah (Thuziah?) zawm tur leh tur lovah hian ka buai fo tak asin. I sawi bak 'in' leh 'na' hman dan tur hi min rawn hrilh leh lawk thei la ka lawm ngawt ang. Eg: kut nghatin nge kut nghat in? Inpekna nge inpek na? Aaaaaa....zirtur kava la ngah tak em! Mahse ka zir zel ang :)

    ReplyDelete
  3. Ziak tha khawp mai. Nute hlutna hi kan la hre dawn chauh nite pawh hian a hriat. Rei tak i update loh hnuah thu tha deu deuh i rawn ziak a. Keipawh ka nu hian Lu chunga kut nghatin min tawngtai fo thin. Ka damlohte pawh hian ka indawh tawp zel.A damloh phei chuan ka mangang thei lutuk. A tawp nan Ka Nu ka HMANGAIH che

    ReplyDelete
  4. Geminiboyz, i ti lawmawm e. Nute hlutna hria a, kan hmangaihzia an damlai ngeia sawi/hriattir mawlh2 hi zawmtlak tak a ni. An damlai ngeia kan hmangaih thu hrilh theia kan la nei hi kan vannei hle a ni.

    ReplyDelete
  5. NU te hlutzia hi aw..nu hmangaihna hi kan pianhma atangin a lo in tan tawh si a.

    ReplyDelete
  6. Ni ngawt mai tiro,Vana. Ka 'amen' mawlh2.

    ReplyDelete
  7. Nu te tangkaizia leh kan tana an hlutzia te hi ziakchhuak thiam ve thin ila ka ti thin ngawt mai. I thuziak a ropuiin, chhiar a manhla takzet. Nu ropui tak i nei a ni.

    ReplyDelete
  8. nu te fel zia, taimak zia an fate min lo ngaihsak zia hi chu kan upa telh telh a kan hrechiang chho telh telh hian ka hre thin....

    ReplyDelete
  9. DL Moody a ni maw kha 'Ka nu ang hi mi zawng2 hian nei vek sela kawvelah hian tanin a awm a ngailovang' titu kha. A nu a chawimawi thiam ngawt mai. Nute hian chawimawi anlo phu takzet a ni.

    ReplyDelete
  10. *Sigh* Beautiful post! Lu chung a kut nghat a kan nu te han tawngtai thin tluk a hahdamthlak kha a awm pawhin ka hre lo. Lo upat hnu a ka mangan leh rilru hah leh nat ber chuan ka nu hian ka lu chungah kut dahin tawngtai se tih hi ka duh ngawih ngawih thin. Nu te hi chu an lo hlu eem ani.

    ReplyDelete